Holderstebolder

Die bloed loop taai teen Vaselinetjie se regterknie af. Daar’s ‘n druppel op die vloer net voor haar bank en sy steek haar voet uit om met haar skoolskoen daaroor te vee voordat die juffrou sien.
Voor in die klas is Donovan Roman besig om vir die hoeveelste keer die week “Nkosi Sikelel’ iAfrika” uit te skryf. Al die ander graadvyfs ken dital uit hul kop - Vaselinetjie die beste van almal. Bo die swartbord hang ‘n groot horlosie. Vaselinetjie probeer nie op die horlosie te kyk nie, want sy weet dit gaan altyd gedurende die dag staan, maar nogtans hou sy die wysers gespanne dop.
Wanneer die huistoegaanklok lui, moet sy eerste by die klas uit wees. Anders gaan sy meer as ‘n stukkende knie het teen die tyd dat sy hulle jaart haal.
Hulle gaan haar slat, het hulle gesê.
Hulle gaan haar dik skop en haar ponies alles uitpluk.
Hulle gaan aanhou en aanhou tot sy vir hulle sê.

Sy is Helena Bosman van ’n piepklein dorpie doer ver in die Noord-Kaap, maar Oupa en Oumie noem haar sommer Vaselinetjie. Sy is hulle veldbosengeltjie, hulle hart se punt. Tot Vaselinetjie tien jaar oud is en die Welsyn haar laat wegstuur na die kosskool in Gauteng – die weeshuis waar Madiba se weggooikinders bly. Dis ’n vreemde, harde, gevaarlike wêreld van skomgatkinders, kwaai huistannies en ’n hardvogtige, onregverdige koshuisvader; van entjies rook, hare laat afskeer en planne maak om te whallap. Waar niemand oor jou traak nie, en waar jy ook leer om oor niemand te traak nie. Maar, soos die maande jare word, kruis een naam telkens Vaselinetjie se pad: Texan Kirby. En daardie naam loop reguit na haar hart.

Vaselinetjie het in 2004 in Afrikaans verskyn. In 2005 is dit bekroon met die M.E.R.-Prys vir Jeugboeke, die Jan Rabie/Rapport-Prys en ‘n M-Net Prys. IBBY het dit in 2006 op sy Ererol geplaas.

Bestel by Kalahari.net